સાબરકાંઠા જીલ્લામાં મીઝલ્સ-રૂબેલા રસીકરણ અભિયાનનો પ્રારંભ

            સમગ્ર રાજયમાં આજે સોમવારના રોજથી ઓરી- નુરબીબી (મીઝલ્‍સ-રૂબેલા) રસીકરણ અભિયાનનો પ્રારંભ કરવામાં આવેલ છે. જે અંતર્ગત  સાબરકાંઠા જીલ્‍લામાં સેન્‍ટ ઝેવીયર્સ, સ્‍કુલ, હિંમતનગર ખાતે જિલ્‍લા વિકાસ અધિકારીશ્રી સ્‍તૃતિ ચારણે રસીકરણ અભિયાનને ખુલ્લુ મુક્યુ હતું. આ પ્રસંગે મુખ્‍ય જીલ્‍લા આરોગ્‍ય અધિકારીશ્રી, ર્ડા.મનીષ ફેન્‍સી, અધિક જીલ્‍લા આરોગ્‍ય અધિકારીશ્રી, જીલ્‍લા આર.સી.એચ.અધિકારીશ્રી, તેમજ જીલ્‍લા તાલુકાના અન્‍ય અધિકારીશ્રીઓ તથા મોટી સંખ્‍યામાં વાલીઓ ઉપસ્‍થિત રહેલ.

      જયારે જીલ્‍લાના પ્રાતિજના અવર ઓન હાઈસ્‍કુલ, ઈડરની કે.એમ.હાઈસ્‍કુલ, ખેડબ્રહમાની જયોતિ હાઈસ્‍કુલ, તલોદના સામૂહિક આરોગ્ય કેન્‍દ્ર, પોશીના, લાંબડીયા, વિજયનગર અને આંતરસુંબા આશ્રમ ખાતે અભિયાનનો પ્રારંભ કરવામાં આવ્‍યો હતો  જેમાં ઈડર ધારાસભ્‍યશ્રી હિતુ કનોડીયા સહિત તાલુકા-જીલ્‍લાના પદાધિકારીશ્રીઓ ઉપસ્‍થિતિ રહી બાળકોને મીઝલ્‍સ-રૂબેલા(એમ.આર.) રસીકરણ માટે પ્રોત્‍સાહિત કર્યા હતા.

 

 

મહિલા કાયદાકીય જાગૃતિ શિબિર યોજાઇ

            સાબરકાંઠા જિલ્લાના હિંમતનગર મેડિકલ કોલેજ ખાતે મહિલા કાયદાકિય જાગૃત્તિ શિબિર ગુજરાત મહિલા આયોગના અધ્યક્ષા શ્રીમતી લીલાબેન અંકોલીયાના અધ્યક્ષ સ્થાને યોજાઇ હતી.

               ગુજરાત મહિલા આયોગનાં અધ્યક્ષા શ્રીમતી લીલાબેન અંકોલીયાએ પ્રાસંગિક ઉદબોધન કરતાં જણાવ્યું હતું કે, સને- ૨૦૦૧ માં તત્કાલીન મુખ્યમંત્રીશ્રી અને હાલના વડાપ્રધાનશ્રી નરેન્દ્રભાઇ મોદીએ મહિલા અને બાળ વિભાગની સ્થાપના કર્યા બાદ સને- ૨૦૦૫ માં મહિલા આયોગની રચના કરવામાં આવી હતી. મહિલાઓનો આર્થિક, શૈક્ષણિક અને સામાજિક ક્ષેત્રે વિકાસ થાય અને પોતાના હક્કો માટે જાગૃત બની  મહિલાઓ પગભર થાય તેવા રાજ્ય સરકારના હેતુને સિધ્ધ કરવા મહિલા આયોગ કામ કરે છે. દરેક જિલ્‍લામાં કાયદાકીય શિબિર કરવામાં આવે છે. જેથી મહિલાઓ કાયદાકિય બાબતો અંગે જાગૃત થાય, રાજ્યમાં એક પણ બહેન રક્ષણથી વંચિત ન રહે તેવો રાજ્ય સરકારનો આશય છે. રાષ્‍ટ્રના વિકાસમાં મહિલાઓની ભૂમિકા મહત્વની છે. સરકારે ૩૦૦ જેટલી મહિલા યોજનાઓ અમલમાં મૂકી છે. તેમણે ચૂંટાયેલી મહિલા પ્રતિનિધિઓએ વિવિધ સહાય, આવાસો, પેન્શન સહાય જેવી બાબતોનો લાભ છેવાડાની મહિલાઓને પણ મળતો થાય તેવી જવાબદારીથી કામગીરી કરવી જોઇએ. રાજ્ય સરકારે ૨૬૭ તાલુકામાં નારી અદાલત કાર્યરત કરી છે. આયોગ દ્વારા ૧૮ જેટલી યુનિવર્સિટીમાં ૪૦ હજારથી વધારે વિદ્યાર્થીઓને કાયદાકિય માર્ગદર્શન આપવામાં આવ્યું છે. ૩૫ લાખ મહિલાઓ તાલીમ મેળવી પગભર થઇ છે. સરકાર દ્વારા ૩૩ ટકા મહિલા અનામત દ્વારા મહિલા સશક્તિકરણમાં સાચા અર્થમાં પ્રયાણ થઇ રહ્યું છે. વધુમાં તેમણે  મહિલાઓને સામાજિક દુષણોમાંથી મુક્તિ મેળવવા સશક્ત થવા અનુરોધ કર્યો હતો. મહિલા આયોગના માર્ગદર્શન દ્વારા શરૂ કરાયેલી ૧૮૧ અભયમ્ ૪૫ લાખથી વધુ મહિલાઓને સુરક્ષા પુરી પાડી છે. મહિલાઓ સક્ષમ બનશે ત્યારે સક્ષમ ભારતનું નિર્માણ થશે. સરકારી યોજનાઓ અને કાયદાકિય જ્ઞાન મેળવી ઉન્નતિના કામો કરવા શ્રીમતી અંકોલીયાએ હિમાયત કરી હતી.

         જિલ્‍લા કલેક્ટરશ્રી પ્રવિણા ડી.કેએ પ્રાસંગિક પ્રવચન કરતા જણાવ્યું હતું કે, રાજ્ય સરકાર દ્વારા દરેક વિભાગોમાં મહિલાલક્ષી યોજના અમલમાં મૂકાય છે. મહિલાઓને મફતમાં શિક્ષણ મળે છે. રાજ્ય સરકારના મહિલા સશક્તિકરણના કાર્યક્રમો અને કાયદાકિય જ્ઞાન થકી અસરકારક પરિણામો આવ્યા છે. મહિલાઓ ઉચ્ચ અને ગુણવત્તાયુક્ત શિક્ષણ મેળવે તેવા સરકારના પ્રયાસો છે. જિલ્‍લા વિકાસ અધિકારી શ્રી સ્તુતિ ચારણે ભાવિ પેઢીના ઘડતરમાં મહિલાઓનો અન્નય ફાળો છે. નારી સશક્ત હશે તો સ્વસ્થ ગુજરાતનું નિર્માણ થઇ શકશે તેમ ભારપૂર્વક જણાવ્યું હતું.

       ગુજરાત મહિલા આયોગના સભ્ય સચિવ અને અધિક કલેક્ટર સુશ્રી વિણાબેન પટેલે મહિલા આયોગ દ્વારા થતી કામગીરીની વિસ્તૃત માહિતી આપતા જણાવ્યું હતું કે, સરકારે મહિલા ઉત્કર્ષની યોજનાઓ અમલમાં મૂકી છે. તેનો મહત્તમ લાભ લેવા, NRI મેરેજ બ્યુરો દ્વારા મહિલાઓને થતા અન્યાયો માટે અલગ સેલની ૨૦૦૮ માં રચના કરી અને તેનાથી ૨૦૦ થી વધારે બહેનોને ન્યાય, તમામ તાલુકા મથકે નારી અદાલત, ચૂંટાયેલી બહેનોને તાલીમ, મહિલા સેલ ફ્રી હેલ્પલાઇન, ૧૮ થી ૨૫ વર્ષના યુવા-યુવતીઓને કાયદાકિય જ્ઞાન, બંધારણીય અધિકાર સ્ત્રી-પુરૂષ એક સમાન વગેરે બાબતો પર વિસ્તૃત સમજ આપી હતી.

       આ પ્રસંગે સમરસ મહિલા સરપંચ શ્રીઓ અને બાળકોના આધારકાર્ડ માટે ટેબ્લેટ મારફતે શ્રેષ્ઠ પ્રવૃતિ કરનાર આંગણવાડી કાર્યકરનું સન્માન કરવામાં આવ્યું હતું. આ શિબિરમાં મહિલા અગ્રણી શ્રી કૌશલ્યા કુંવરબા, નગરપાલિકા પૂર્વ પ્રમુખ શ્રીમતી નિલાબેન પટેલ, નગરપાલિકા ઉપપ્રમુખ શ્રીમતી જયાબેન પટેલ સહિત  જિલ્‍લા પ્રોગ્રામ ઓફિસરશ્રી જિલ્લાની આંગણવાડીની બહેનો, શહેરી-ગ્રામ્ય મહિલાઓ મોટી સંખ્યામાં ઉપસ્થિત રહ્યાં હતાં.

 

આગીયોલ ખાતે શાળા પ્રવેશોત્સવ કાર્યક્રમ યોજાયો.

જીલ્લા વિકાસ અધિકારીશ્રીએ આગીયોલ, તા- હિમતનગર ખાતે કેળવણી મહોત્સવ અને શાળા પ્રવેશોત્સવ કાર્યક્રમ અંતર્ગત પ્રવેશપાત્ર બાળકોને શાળામાં પ્રવેશ કરાવ્યો હતો. કાર્યક્રમને અંતે શાળાના મેદાનમાં વૃક્ષારોપણ કરવામાં આવેલ.

માન. મુખ્‍યમંંત્રીશ્રીના હસ્‍તે શાળા પ્રવેશોત્‍સ્‍વ કાર્યક્રમ યોજાયો

          માન. મુખ્યમંત્રીશ્રીએ ૧૪મી જુન નારોજ કેળવણી મહોત્સવ અને શાળા પ્રવેશોત્સવની શૃંખલાની ૧૬મી કડીનો સાબરકાંઠા જિલ્લાના પોશીના તાલુકાના લાંબડીયા ખાતે પ્રારંભ કરાવ્યો હતો. આ તબક્કે લાંબડીયા, દેમતી અને નવાધરાના બાળકોને ધોરણ-૧માં પ્રવેશ કરાવ્યો હતો. જ્યારે ભુલકાંઓને આંગણવાડીમાં અને ધોરણ-૯ તથા ધોરણ-૧૧માં વિદ્યાર્થીઓનું નામાંકન કરાવ્યું હતું.
મુખ્યમંત્રી શ્રી વિજયભાઇ રૂપાણીએઆ પ્રસંગે જણાવ્યુકે હવેનો યુગ એ જ્ઞાનનો યુગ છે. શિક્ષણ વિના ઉધ્ધાર નથી અને શિક્ષણ જ સર્વાંગી વિકાસનો પાયો છે ત્યારે શિક્ષણ મેળવવાની ભાવના પ્રબળ બનશે તો જ ભારતનું ભવિષ્ય ઉજ્જવળ બનશે. બાળકો શિક્ષણ મેળવવા-શાળાએ જવા પ્રેરાય તેવું વાતાવરણ નિર્માણ થશે તો આગામી પેઢી શિક્ષિત બનશે અને તેના પગલે શિક્ષિત સમાજનું નિર્માણ પણ થશે. કોઇપણ રાજ્ય-દેશનો વિકાસ શિક્ષણ વિના શકય નથી એમ તેમણે આ વેળાએ સ્પષ્ટપણે જણાવ્યું હતું.

          આ ઉપરાંત મુખ્યમંત્રીશ્રીએ આદિજાતી પોશીના તાલુકાના સાધુફળો ખાતે રૂ. ૧.૪પ કરોડના ખર્ચે નવનિર્મિત સિઝનલ હોસ્ટેલ તથા રૂા. પ.૦૮ કરોડના ખર્ચે બનાવાયેલા પ્રાથમિક શાળાઓના ૬૦ ઓરડાઓનું પણ લોકાર્પણ કર્યુ હતુ. પોશીના તાલુકાની વિદ્યાર્થીનીઓને વિદ્યાલક્ષ્મી બોન્ડ તથા સરસ્વતી સાધના યોજના અંતર્ગત દિકરીઓને સાયકલોનું પણ વિતરણ કરાયું હતું.
મુખ્યમંત્રીશ્રીએ કહ્યું કે, એક સમય હતો કે બાળકો શાળાએ રડતા-રડતા જતા અને નામાંકનમાં ગુજરાત પછળ હતું પણ આપણા દીર્ઘદ્રષ્ટા વડાપ્રધાન અને તત્કાલિન મુખ્યમંત્રી શ્રી નરેન્દ્રભાઇ મોદીએ ૧૦૦ ટકા નામાંકનના ધ્યેય સાથે શાળા પ્રવેશોત્સવ શરૂ કર્યો. વર્તમાન ગુજરાત સરકારે આ કાર્યક્રમને વધુ પરિણામલક્ષી બનાવવા કમર કસી રાજ્યનું એક પણ બાળક શાળાએ ગયા વિનાનું ન રહે અને શિક્ષણ મેળવવાથી વંચિત ન રહે તેવી વ્યવસ્થા શાળાપ્રવેશોત્સવથી સુનિશ્ચિત કરી છે.
મુખ્યમંત્રીશ્રીએ આજે પારસ વિદ્યાલયના એસ.એમ.સી.ના સભ્યો સાથે બેઠક કરી શાળામાં શૈક્ષણિક સુવિધાઓ, અન્ય સુવિધાઓ અનુકુળ વાતાવરણ માટે શિક્ષકો-વાલીઓ વચ્ચે સમન્વય સહયોગ અંગે પણ સર્વગ્રાહી સમીક્ષા કરી સૂચનો કર્યા હતા.
આ પ્રસંગે પોશીના તાલુકા સરપંચ એસોસીએશન દ્વારા મુખ્યમંત્રીશ્રીને કન્યા કેળવળી નિધિમાં રૂ. રપ,૦૦૦/- પારસ વિદ્યાલયના દાતા અને ટ્રસ્ટી શ્રી સંકીતભાઇ દોશી દ્વારા રૂા. પ૧,૦૦૦/-નો અને વ્યાપારી મહામંડળ દ્વારા રૂા.પ૧,૦૦૦/-નો ચેક અર્પણ કરાયો હતો.

માન. મુખ્યમંત્રીશ્રીના વરદહસ્તે સાબરકાંઠા જિલ્લાના ખેડબ્રહમા તાલુકાની માંગોળવાડી નદીને પુનઃજીવિત કરવાનો કાર્યક્રમ

સુજલામ સુફલામ જળઅભિયાન-૨૦૧૮

માન. મુખ્યમંત્રીશ્રીના વરદહસ્તે સાબરકાંઠા જિલ્લાના ખેડબ્રહમા તાલુકાની માંગોળવાડી નદીને પુનઃજીવિત કરવાનો કાર્યક્રમ યોજાયો. ..

          માન. મુખ્યમંત્રીશ્રીના વરદ હસ્‍તે  આજરોજ સાબરકાંઠા જિલ્લાના ખેડબ્રહ્મા તાલુકાના બાવળકાંઠીયા ખાતે માંગોળવાડી નદીને પુનઃજીવિત કરવાના ભાગરૂપે ચેકડેમ નિર્માણનું ભૂમિપૂજન કરવામાં આવ્‍યું. આ પ્રસંગે તેઓના પ્રેરક વકતવ્‍યમાં માન. મુખ્યમંત્રી શ્રી વિજયભાઇ રૂપાણીએ જણાવ્યું કે, પાણીએ પરમેશ્વરનો પ્રસાદછે.  તેનું એકએક ટીપું રોકાય અને સંગ્રહાય તે માટે ચોમાસાના આગમન પૂર્વે જળસંચયના કામો જનસહયોગથી હાથ ધરવાનું મહાઅભિયાન હાથધર્યું છે. પાણીએ વિકાસનો પાયો છે.    ગુજરાતનું આ અભિયાન પણ દેશને નવી દિશા આપશે તેવો વિશ્વાસ વ્યકત કરી મુખ્યમંત્રીશ્રીએ જણાવ્યું હતું કે, પાણીએ ધરતીપરનું અમૃત છે. તેનો સંચય સંગ્રહ અત્યંત જરૂરી છે. આ સંગ્રહથી જળસંકટ પર વિજય મેળવવા તેમણે આહવાન કર્યુ હતું.

         આ મહાઅભિયાનમાં જે.સી.બી., ટ્રેકટર-ડમ્પરનો ઉપયોગ થાય છે તેમજ લાખો શ્રમિકો રોજગારી મેળવી રહ્યાછે એમ તેમણે ઉમેર્યું હતું.

      સાબરકાંઠા જિલ્લામાં આ અભિયાનની વિગતો આપતાં મુખ્યમંત્રીશ્રીએ જણાવ્યું હતુકે,  જિલ્લામાં ખેતી માટે સિંચાઈનું પાણી ઉપલબ્ધ કરવા તળાવો ઉંડા કરવા, ચેકડેમનું ડિસીલ્ટીંગ, નહોરોના ડિસીલ્ટીંગ સહિત ૭૬૫ જેટલા જળસંચયના કામો ઉપાડ્યા છે. જે અંતર્ગત સાબરકાંઠા જિલ્લામાં તળાવ ઉંડા કરવા, ચેકડેમ-નહેરોની સફાઇ સહિત ૫૫૦થી વધુ જળ સંચયના કામો હાથ ધરવામાં આવ્યા છે.

આ પ્રસંગે ગુજરાત વિધાનસભાના પૂર્વ અધ્યક્ષશ્રી રમણલાલ વોરા,   શ્રી દિપસિંહ રાઠોડ, જિલ્‍લા સાંસદશ્રી, ધારાસભ્યશ્રી હિતુભાઈ કનોડીયા,  રમીલાબેન બારા,    જિલ્લા પ્રભારી સચિવ શ્રીમતી જયંતિ રવિ (આઇ.એ.એસ), જિલ્‍લા કલેકટરશ્રી શ્રી પ્રવિણા ડી. કે. (આઇ.એ.એસ),  જિલ્લા વિકાસ અધિકારીશ્રી શ્રી સ્‍તુતિ ચારણ (આઇ.એ.એસ) તથા  જિલ્લા-તાલુકાના હોદ્દેદારો-પદાધિકારીઓ, અધિકારીશ્રીઓ તથા મોટી સંખ્‍યામાં પ્રજાજનો ઉપસ્થિત રહ્યા હતા.

 

 

જીલ્‍લા પંચાયત ખાતે એક દીવસીય કાર્યશાળા યોજાઇ

          જીલ્લા વિકાસ અધિકારીશ્રી હર્ષ વ્યાસ (આઇ.એ.એસ) ની પ્રેરણા અને માર્ગદર્શન હેઠળ જિલા આંકાડા અધિકારીશ્રી ની કચેરી દ્વારા તમામ તાલુકા વિકાસ અધિકારીશ્રી, તાલુકા પ્રાથમિક શિક્ષણાધિકારીશ્રી,નાયબ તાલુકા વિકાસ અધિકારીશ્રી અને તલાટી કમ મંત્રીશ્રીઓની એક  દિવસની કાર્યશાળા યોજાઈ.

             આજની કાર્યશાળામાં પંચાયતી રાજ નાં વિષય નિષ્ણાત શ્રી પ્રકાશ મોદી ડેપ્યુટી કલેકટરશ્રી, હાલ માન.કૃષિ મંત્રીશ્રીના પર્સનલ સેક્રેટરીશ્રીએ પંચાયતીરાજ ધારો, પંચાયતની વિવિધ સમયે બોલાવવાની બેઠકો, ગુજરાત પંચાયત અધિનિયમ-૧૯૯૩,ગુજરાત પંચાયત (કાર્યરીતી) નિયમો-૧૯૯૭,અંગે ઉપસ્થિત સર્વેને માર્ગદર્શન આપવામાં આવેલ.

           આજ ઉપક્રમે રાઈટ ટુ ઇન્ફોર્મેશન અંગે સર્વેને માહિત અને માર્ગદર્શન મળી રહે તે માટે વિષય નિષ્ણાત નિવ્રૂત નાયબ પશુપાલન નિયામક શ્રી ડો. એ.કે.ગણાત્રાએ માહિતી અધિકાર નાં કાયદા અંગેની વિવિધ કલમો અને તેનો કચેરીની કામગીરીમાં કેવીરીતે ઉપયોગ કરીશકાય તે અંગે દ્રષ્ટાંત સહીત માર્ગદર્શન આપેલ. કાર્યશાળાના અંતે બંને વિષય નિષ્ણાત દ્વારા પ્રશ્નોતરી પણ કરવામાં આવેલ.

          આજની કાર્યશાળામાં જીલ્લા પંચાયત પ્રમુખશ્રી રાજેન્દ્રસિંહ કુંપાવત, નાયબ જીલ્લા વિકાસ અધિકારીશ્રી એ.એમ.દેસાઈ,જીલ્લા આંકડા અધિકારીશ્રી જે.કે.ચાવડા ઉપસ્થિત રહેલ.

ઇડરની કેશરપુરા પ્રા.શાળ બની બાલ અભયારણ

          બાળ અભ્યારણ – કેશરપુરા પ્રાથમિક શાળામાં ૨૩ માર્ચ નાં રોજ જીલ્લા વિકાસ અધીકારીશ્રી હર્ષ વ્યાસ (આઈ.એ.એસ) અને જીલ્લા પ્રાથમિક શિક્ષણાધિકારી શ્રી રમેશ ઉપાધ્યાયની પ્રેરક ઉપસ્થિતિમાં શાળાનો વાર્ષિકોત્સવ ઉજવાયો.
મારી શાળા કુપોષણ મુકત શાળા અને ઓનલાઈન શાળા બેંક નું મહેમાનોની ઉપસ્થિતિમાં ઉદઘાટન કરવામાં આવેલ. શાળાના બાળકો દ્વારા સુંદર સાંસ્કૃતિક કાર્યક્રમોની મનભાવન રજૂઆત કરવામાં આવેલ.
શાળાના કાર્યક્રમમાં ગ્રામજનો પણ મોટી સંખ્યામાં હાજર રહેલ.

 

વિજયનગરની પોળો ખાતે મહેસૂલી અધિકારીઓની ચિંતન શિબિર યોજાઇ

          પ્રજાકિય પ્રશ્નો વધુ સરળ રીતે ઉકેલ આવે અને અરજદારોને તેમના મળતા લાભ ત્વરીત મળતા થાય તેવા શુભ આશય સાથે સાબરકાંઠા જિલ્લાના મહેસૂલી અધિકારીઓની ચિંતન શિબિર વિજયનગરની પોળો ખાતે જિલ્લા પ્રભારી સચિવ શ્રીમતી જયંતિ રવિની અધ્યક્ષતામાં યોજાયી હતી. આ પ્રસંગે જિલ્લા સમાહર્તા શ્રી પી.સ્વરૂપ અને જિલ્લા વિકાસ અધિકારી શ્રી હર્ષ વ્યાસ વિશેષ ઉપસ્થિત રહ્યા હતા.

             પ્રાસંગિક પ્રવચન કરતા પ્રભારી સચિવ શ્રીમતી જયંતિ રવિએ જણાવ્યું હતુંકે, મહેસૂલી પ્રક્રિયા જેટલી જટીલ છે તેને વધુ સરળ બનાવી પ્રજાના પ્રશ્નોનો હકારાત્મક નિકાલ કરવો જોઇએ. વધુમાં તેમણે મહેસૂલી સાથે આરોગ્યની જવાબદારી વહન કરવા પર ભાર મુક્યો હતો.

             જિલ્લા સમાહર્તા શ્રી પી.સ્વરૂપે મહેસૂલી પરીવારમાં આવેલા નવિન કર્લાક/તલાટીઓ ગ્રામ્ય વિસ્તારના પાયાના પ્રશ્નો સમજવાની જરૂરીયાત છે. સાથે સાથે મહેસૂલી કાયદાઓ અને તેના લગતા કામોની સમજવુ એટલુ જ જરૂરી છે.  જિલ્લા વિકાસ અધિકારીશ્રી હર્ષ વ્યાસે જિલ્લામાં થઇ રહેલા આરોગ્યની કામગીરીની રૂપરેખા આપી હતી.

           ચિંતન શિબિરમાં હિંમતનગર પ્રાંત અધિકારી શ્રીમતી નિશા શર્મા દ્વારા પરીપત્રો અને કાયદાઓ વિષે સમજ આપી હતી. જયારે ઇડર પ્રાંત અધિકારી શ્રી અ.જે.દેસાઇએ અરજદાર સાથે વર્તન અને વ્યવહાર, પ્રાંતિજ પ્રાંત અધિકારી શ્રી ચૌધરીએ મહેસૂલી અધિકારીઓના લોકસંપર્ક અને પ્રવાસ અંગેની સમજ આપી હતી.

          આ પ્રસંગે અધિક કલેકટર શ્રી વી.એલ.પટેલ, તમામ પ્રાંત અધિકારીશ્રીઓ, મામલતદારશ્રીઓ સહિત મહેસૂલી શાખાના અધિકારી/કર્મચારીઓ ઉપસ્થિત રહ્યા હતા.

મેલેરિયા મુકત ગુજરાત -૨૦૨૨

નેશનલ વેક્ટર બોર્ન ડિસીઝ કંટ્રોલ પોગ્રામ અંતર્ગત વિભાગીય નાયબ                     નિયામકની કચેરી, ગાંધીનગર દ્વારા સાબરકાંઠા અને અરવલ્લી જીલ્લાના લેબોરેટરી ટેક્ની.ને મેલેરિયા મુકત ગુજરાત -૨૦૨૨ અભિયાન હેઠળ વહેલું નિદાન અને સંપૂરણ સારવાર પદ્ધતિથી જન સમુદાયમાં રહેલ મેલેરિયા, ડેન્ગ્યું અને ચીકુનગુનીયા નાં કેસોને શોધી તાત્કાલિક સારવાર આપવાના ઉમદા ઉદેશથી ૫ દિવસની તાલીમનું આયોજન કરવામાં આવેલ.
વિભાગીય નાયબ નિયામક ની કચેરીએથી એન્ટોમોલોજીસ્ટ નરેન્દ્ર પટેલ અને સીનીયર લેબ ટેક કિશોર મુલાણી એ સમગ્ર ૫ દિવસની તાલીમ આપેલ.
સાબરકાંઠા જીલ્લા વિકાસ અધિકારીશ્રી હર્ષ વ્યાસ (આઈ.એ.એસ)એ તાલીમમાં ખાસ ઉપસ્થિત રહી સર્વેને જણાવ્યુકે આપણે પ્રાથમિક આરોગ્ય કેન્દ્ર અને સબ સેન્ટર કક્ષાએથી છેવાડાના માનવી સુધી ગુણવતાયુકત અને સમયસર સેવાઓ માટે કર્મયોગી બનવાનું છે. આરોગ્ય સેવાઓની સગર્ભાવસ્થા થી જીવન પર્યંત જરૂરત રહેછે. આ માટે આપણે કટિબદ્ધ બનવાનું છે. માન. સરકારશ્રીએ વર્ષ ૨૦૨૨ માં મેલેરિયા મુકત ગુજરાત નું લક્ષ્ય રાખ્યું છે. આ લક્ષ્ય ને હાંસલ કરવામાટે લેબોરેટરી ટેક્ની. ની સેવાઓ અતિમહત્વની છે.
આ તાલીમમાં મુખ્ય જીલ્લા આરોગ્ય અધિકારી શ્રી મનીષ ફેન્સી અને જીલ્લા મેલેરિયા અધિકારીશ્રી બનેસિંહ રાઠોડે પણ ઉપસ્થિત રહી સર્વે તાલીમાર્થીઓને વિષયોચિત માર્ગદર્શન આપેલ.

 

તલાટી અને ગ્રામ સેવકોને જાગૃતિ કેળવવા તાલીમ યોજાઇ

          જીલ્લા પંચાયત સાબરકાંઠા ખાતે જીલ્લા વિકાસ અધિકારીશ્રીની અધ્યક્ષતામાં આંકડાકીય માહિતીના એકત્રીકરણમાં તલાટી અને ગ્રામ સેવકોને જાગૃતિ કેળવવા તાલીમનું આયોજન કરવામાં આવેલ

          આજની તાલીમમાં ઉપસ્થિત તલાટી કમ મંત્રીઓ અને ગ્રામસેવકોને આંકાડાકીય કામગીરીમાં ચોકસાઈ રાખવા, રાજ્ય અને જીલ્લા કક્ષાએ નિભાવવામાં આવતાં આંકડા તેમજ વિલેજ પ્રોફાઈલનાં ડેટાની અગત્યતા અંગે માર્ગદર્શિત કરવામાં આવેલ.

          જીલ્લા આંકડા અધિકારીશ્રીએ માહિતીના એકત્રીકરણ અંગે ખેતી વિષયક,પશુધન ગણતરી, આર્થિક ગણતરી, બિજનેસ રજીસ્‍ટર, જન્મ મરણનાં આંકડા, આરોગ્યવિભાગ, શિક્ષણ વિભાગ, વિકાસ શાખા ને લગતી બાબતે ઉપસ્થિત સર્વે કર્મચારીઓને વિસ્તૃત જાણકારી આપવામાં આવેલ.

          જીલ્લા વિકાસ અધિકારીશ્રી હર્ષ વ્યાસ (આઈ.એ.એસ)એ નવીન નિમણુક પામેલ તલાટી કમ મંત્રી અને ગ્રામસેવકોને પંચાયત ધારાની વિવિધ જોગવાઈઓ,સરપંચશ્રી,ઉપસરપંચશ્રી તથા વોર્ડ સભ્યોની ફરજો-જવાબદારીઓ,ગૌચર, દબાણના વિવિધ પ્રશ્નો અને તેના નિકાલ.જેવા ગ્રામ્યકક્ષાનાં અતિમહત્વના પ્રશ્નો અંગે માર્ગદર્શિત કરેલ.

           જીલ્લા પંચાયત પ્રમુખશ્રી રાજેન્દ્રસિંહ કુમ્પાવતે તાલીમમાં ઉપસ્થિત રહીને સર્વે કર્મચારીઓ ને વિષયોચિત માર્ગદર્શન આપેલ.

       આ તાલીમમાં જીલ્લા ખેતીવાડી અધિકારીશ્રી, હિસાબી અધિકારીશ્રી,વિષય નિષ્ણાત નિવ્રૂત જીલ્લા ઓડીટરશ્રી પણ ઉપસ્થિત રહેલ

1 2 3 4